1. يعني إيه صدمة نفسية أو تروما؟ أي حاجة وحشة بتحصلك بيكون تأثيرها عليك جامد بشكل كبير أو overwhelming لدرجة إنك متعرفش تفهمها أو تتعامل معاها وتعديها بشكل طبيعي.. أو تفتكرها بشكل طبيعي.. حدث سيء جدًا وقوي جدًا.. استخبى جواك وبالتالي انت مش قادر تشوفه .. ولكن بتعرف إنه موجود جواك من الألم اللي بتحسه بسببه.. توتر.. قلق.. غضب.. حزن.. مشاكل ف النوم أو الأكل.. أو حتى الذنب لإنك بتلوم نفسك وانت الضحية.. لو بس كنت مشيت بدري 5 دقايق.. لو بس مكنتش خرجت بليل متأخر.. فيه فيديو عن الموضوع ده شوفه من هنا.. كمية ضغط رهيبة.. معظم التروما أو الصدمات دي بتحصلنا وإحنا أطفال.. لإننا بنبقى أكثر عرضة للصدمة ومش قادرين نفهم الدنيا حوالينا عاملة إزاي.. الطفل حساس جدًا لحاجات زي الزعيق.. والإهمال من الأهل، دي من الحاجات اللي ممكن تسبب صدمة للطفل.. إنه محدش مهتم بيه.. إنه مش محبوب.. إحساس الطفل إنه محدش بيحبه -أو الصدمة دي- بتخليه على طول خايف، طب وإيه يعني؟
2. التروما بتعمل فيك إيه؟ فيه احتمال متبقاش عارف حاجة عن الصدمة دي وهي جواك.. إنت بس بتلاقي نفسك عارف إنك خايف.. خايف على طول.. مش عارف ليه.. خايف كل الناس تتريق عليك لو عملت كذا.. خايف تثق ف أي حد لإنك دايمًا بتحط احتمال إنه ممكن يإذيك.. ومن كتر الضغط ده.. عقلك بيعمل حاجتين عكس بعض.. ساعات يحاول ينكر إن التروما دي حصلت فعلا.. أو يفضل يعيد لك الذاكرة المرعبة دي.. زي الشريط، كل ما يخلص يتعاد من الأول.. فالتجربة الصعبة اللي حد بيبقى عاشها مرة واحدة ف الواقع.. بيبقى عاشها عدد لا نهائي م المرات ف دماغه.. أو يحس إن الصدمة دي هاتحصله تاني.. وبالتالي عادي جدًا ان الشخص ده يجيله كوابيس كتير… لإن جهازه العصبي من كتر الصدمة مبيقدرش يهدي تمامًا للدرجة إنه يخليك تنام كويس.. واحتمال كبير بيجيله major depressive disorder أو اكتئاب.. موود وحش ع طول، حالة من اللا مبالاة.. وف النهاية أفكار انتحارية..
3. متقولش إيه لحد عنده تروما؟ أغبى حاجة تقولها لحد عنده تروما.. إنه حاول متفكرش كتير ف اللي حصل.. لإنه ببساطة عقل الشخص ده بيعيد له اللي حصل بكل تفاصيله طول الوقت غصب عنه.. ف لما تقوله متفكرش ف الموضوع.. كأنك بتقوله بلاش يبقى عندك صدمة!! حاجة تانية إنك تقوله خليك قوي أو استرجل وكدا.. لإنه أي حد بيتعرض لصدمة إنه يحس إنه Vulnerable أو ضعيف.. عقله بيصورله إنه لو كان قوي مكنش حصله كده.. ف حين إن دي ردود أفعال طبيعية جدًا.. بس هو محدش بيقولُّه.. طب وبعدين؟
4. هل ممكن تعالج التروما لوحدك؟ حالات كتير بتحتاج علاج نفسي بيعتمد بشكل أساسي على تكنيك اسمه exposure therapy .. ده أشهر طريقة ف علاج الصدمات النفسية وممكن نعمل عليه بوست لوحده… بس لو مفيش فرصة تروح لدكتور .. فيه حاجات ممكن تعملها عشان تخليك أحسن.. أساس الـ CBT أو العلاج النفسي دلوقتي هو إن الأفكار بتولَّد مشاعر.. التعامل مع أي مشكلة نفسية مبني ع القاعدة البسيطة دي.. وبالتالي.. أول حاجة تعملها إنك تفكر ف إيه اللي مش ماشي كويس ف حياتك دلوقتي، بسبب اللي حصل؟.. إيه بالظبط المواقف اللي بتخليك حسَّاس بزيادة.. تتعصب بسرعة أو تحس بالذنب.. هدف الحوار ده إنك تبقى واعي بإزاي أفكارك بتأثر عليك دلوقتي.. وإزاي هتأثر عليك بعد كده.. الهدف العلمي بقى.. إنه يخلي الصدمة ف دماغك كميموري مرتبطة بمركز تاني ف المخ.. مسؤول عن التفكير.. مش الـ amygdalya أو الحتة اللي ف دماغك اللي مسؤولة عن المشاعر.. واللي بتخليك تحس كل المشاعر السلبية دي.. واللي مخك بيحاول بكل طاقته ميفتكرهاش.. وبتفضل تطلعلك ف كل حاجة وتخليك مش عارف تعيش حياتك.. أشهر تمرين الدكاتره بتقوله إنك تجيب نوته، وتقسم الصفحة النص الأول للأفكار (تكتب فيه كل الأفكار السلبية اللي بتفكر فيها) والنص التاني للمشاعر.. تكتب فيه المشاعر اللي حسيتها مع كل فكرة إنت كتبتها.. وأول ما تفتكر أي حاجة تكتبها بالمشاعر بتاعتها.. الهدف من الموضوع ده إنك عقلك ع فترات بيطلعلك جزء م اللي هو دافنه ده.. وكل ما تحس بمشاعرك وتفكر فيها بالكتابة.. كل ما هاتبقى أحسن..
5. إيه اللي بيمنعك إنك تتحسن؟ فيه ناس بتتحسن مع الوقت وناس لأ.. ده بسبب الـ triggers .. ودي ببساطة كلمات أو مواقف أو حاجات بسيطة بتخلي مخك يعيدلك شريط الصدمة كله ف دماغه تاني.. ومن هنا جاي اسمها من زناد المسدس.. في مقال لدكتور نفسي اسمه مارك بانشيك بيقول إنه حلها إنك متحاوش تنكر اللي حصل وتتقبل الواقع.. بالذات لو الصدمة ليها علاقة بإن حد عزيز عليك إتوفى.. تاني حاجة تحاول تتعرف على الـtriggers بتاعتك أو إيه اللي بيخليك تعيش كل حاجة تاني، وده بيخليك بدل ما تستجيب للـtrigger كل مرة إنك تقدر تكسر الدايرة بتاعته..
6. الجانب الإيجابي للتروما!! في دراسة اسمها “النمو بعد الصدمة” على موقع الـ APA.. بتقول لورنا كولييه إنه من نص لـ تلتين الناس اللي بتتعرض لتروما.. بيبقى عندهم نظرة مختلفة للحياة .. بيبقوا أكثر قدرة على ترتيب أولوياتهم وقادرين يشوفوا قيمة الحاجات اللي ف حياتهم بجد.. بيبقوا عارفين بعد كده إيه اللي يستاهل وإيه اللي ميستاهلش.. وعلاقتهم بتبقى أقوى.. بيبقوا عارفين يساعدوا الناس أكتر ويبقوا موجودين للناس اللي ف حياتهم.. بيقدروا يكونوا صداقات أعمق.. بيبقوا منفتحين أكتر على الحياة، قادرين ياخدوا قرارات بشكل أفضل.. بيبقوا قادرين يشوفوا أد ايه هما اقويا وقد ايه قادرين يعتمدوا ع نفسهم ف الحياة.. آخر حاجة إنهم لو متدينين ف التجارب القاسية دي بتزود ايمانهم بشكل أو بآخر.. ويخليهم أكثر قدرة إنهم يسامحوا اللي قدامهم..

في النهاية: التروما شيء مؤسف جدًا.. وأي حد بيتعرض لتروما بيبقى محتاج حد يحبه ويقبل اللي حصله، لإن جزء كبير من الرعب عند أي حد اتعرض لصدمة إنه بقى خلاص معيوب.. وإن مفيش حد هايقبله وهو معيوب كده.. ولكن.. اللي بيبقى محظوظ إنه يلاقي حب وقبول من اللي حواليه.. بيخليه عنده قدرة أكبر يتعامل مع اللي حصل.. ف تقدر.. تاخد لحظة عشان تقف وتفكر ف ردود أفعالك ع كل حاجة.. وإنه مش شرط تبقى إنت اللي وحش ف كل علاقة بتدخلها أو إنت اللي غلطان ف أي موقف ف الشغل..