سيكولوجي بالعامية ٣: ليه بنحس بالملل وانعدام الطاقة؟
- سيكولوجي بالعامية 1: كيف تتغلب على صدمة نفسيَّة؟
- سيكولوجي بالعامية (٢): ليه ممكن نختار شريك حياة غير مناسب؟
- ☑ سيكولوجي بالعامية ٣: ليه بنحس بالملل وانعدام الطاقة؟
Mark Alfons
عقلك بياخد رد فعل. في كتابه Solving procrastination puzzle .. timothy pychyl… أستاذ علم النفس ف جامعة كارلتون، بيقول إن إحساسك إن مفيش طاقة ده هو emotionally-based response أو رد فعل ع المشاعر السلبية.. يعني لو عندك حاجة مطلوب منك تعملها.. والحاجة دي بتوترك.. عشان مثلا قلقان أو خايف متعرفش تعملها كويس.. عقلك بيحاول يقلل التوتر ده بإنه يبعدك عن الـtask كلها.. فتحس إنك معندكش طاقة تعملها.. عقلك بيعمل كدا عشان هو متبرمج يحميك ويحافظ عليك من معدلات القلق والتوتر العالية… فيه دراسة لقت إن فيه علاقة طردية بين كمية مشاعرك السلبية وبين إحساسك بالزهق وعدم الطاقة… عشان كده الناس اللي بتمر بفترة صعبة بيحسوا إنهم معندهومش طاقة يعملوا حاجة.
عقلك بيبالغ ف تقدير الوقت. في دراسة اتعملت من سنتين على 16 ألف موظف.. لقت إنهم بقوا بيشتغلوا أحسن لما بقوا شغالين من البيت بسبب فيرس كورونا.. بس بسبب إنْ عقلك مش متعود على كدا.. لقت إن عقلك بيعمل حاجة اسمها overestimation في الوقت والمجهود، يعني يقولك إن عمل أو حاجة معينة محتاجة يومين شغل وهي متاخدش ساعتين.. الـ report ده محتاج مجهود مش طبيعي وهو في الحقيقة عادي.. مخك بيعمل كده كنوع من التعامل مع الضغط لإنه مش متعود ع الظروف دي.. وسواء بقى المهمة دي إنك تعمل دايت أو تروح الجيم، عقلك بيتصور إن الموضوع محتاج وقت أكبر بكتير من الحقيقة، وبالتالي هايقولك إن الموضوع محتاج وقت ومجهود كبير جدًا، فإنت تتجنبه خالص نتيجة ده..
عقلك مش عارف بيعمل كدا ليه؟ خلينا نفترض إنك عايز تخلص حاجة معينة بكره.. عقلك بيعتمد ع حاجة اسمها self-control .. يعني يقول لنفسه.. أنا هاعد بكره أخلَّص اللي ورايا.. طب إيه اللي بيحرك الـ self-control ده؟ إن يبقى عندك دافع! لو عندك دافع قوي أو كافي تعمل حاجة معينة.. عقلك هايعرف يخليك تتحكم ف نفسك كويس ومتكسلش وتعملها.. بس المشكلة إن ساعات كتير مبيبقاش عندك دافع حقيقي.. عشان مثلا خايف تفشل أو قلقان أو مرهق أو الهدف من الحاجة دي بعيد أو مش واضح.. كونك مش عارف بشكل واضح إنت عايز تعمل كدا ليه، بيخلي معندكش طاقة.. فكرة إنك عايز تبقى fit مش واضحة.. بس فكرة إنك عايز تجري نص ساعة كل يوم ع الـ treadmill قبل الشغل دي فكرة واضحة.. وهكذا..
ظاهرة الـ Hyperbolic discounting ده ببساطة مصطلح في الـ behavioral psychology معناه إنه عقلك بيختار الحاجة اللي يقدر يوصلها دلوقتي حتى لو صغيرة وميختارش حاجة كبيرة بس محتاجة وقت أطول عشان يوصلها.. عقلك بيشوف المكافأة أو الهدف الأبعد صغير.. ويقلل منه.. حتى لو هو كان في الحقيقة أكبر بكتير.. لو الامتحان لسه فاضل عليه شهرين.. ده بيحسسك إن الموضوع سهل ولسه بدري.. فتكسل ومتذاكرش، لإن من بعيد الموضوع سهل.. لما يبقى فاضل يومين.. بتشوفه صعب وتقول أنا عملت ف نفسي كدا ليه.. عقلك عنده انحياز للحاضر present bias .. إنه لا شعوريًا بيميل للحاجة اللي نتيجتها هتبان دلوقتي.. طيب بس لو فيه حاجات كتير دلوقتي؟
5. الـchoice paralysis أو شلل الاختيارات. لما يبقى وراك حاجات كتير المفروض تختار منها.. عقلك بيزهق. كُتر الاختيارات بيحيره، بيخليه ميعرفش أو مبيلحقش يحلل كل الاختيارات بشكل منطقي.. ودايمًا كل ما تبقى اختياراتك أكتر، كل ما احتمال إنك تختار أسوأ اختيار فيهم بتزيد.. زي ما قالت دراسة اتنشرت ف 2014.. عقلك بيعد يأجل القرار على قد ما يقدر، ويخليك زهقان ومتعملش حاجة.. زي الجواز مثلا.. لو بنت قدامها عريسين تختارِ منهم.. فيه احتمال 50% اختيارها يطلع غلط.. إنما لو قدامها 100 عريس.. النسبة بقت 1%… الموضوع بقى اصعب.. فالعقل يقرر أي حاجة، وغالبًا بيطلع غلط.. لإن احتمال إنه يطلع صح بتقل مع كُتر الاختيارات.
عقلك بيفصل نفسه عن المستقبل. أو ظاهرة الـ temporal disjunction يعني عقلك بيخليك متفكرش ف نتيجة اللي انت بتعمله.. وقت ما تكون بتعمله.. ده بيفسرلنا ليه اللي بيعمل كارثة مبيفكرش ف نتيجتها وهو بيعملها.. وقت ما بتتصرف عقلك بيفصلك عن أي حاجة ليها علاقة بالمستقبل.. طب ليه عقلك بيعمل كدا؟ بسبب حاجة اسمها short-term mood repair، يعني مخك بيحاول يغير مودك دلوقتي من غير ما يفكر ف حاجة تاني.. تحس أحسن دلوقتي مش إيه اللي هايحسسك أحسن بعد شهرين تلاتة.. ده بيخلي الموضوع صعب إنك تبدأ في حاجة مش هتلاقي نتيجتها في وقتها.. في تجربة مشهورة اسمها the marshmallow effect.. عالم اسمه والتر ميشيل أستاذ علم النفس ف جامعة كولومبيا .. جاب أطفال من 5-6 سنين، الطفل بيعد ف اوضة لوحده.. ويديله واحدة مارشميلو، ويقوله، انت ممكن تاكلها دلوقتي.. وممكن تستنى 15 دقيقة متجيش جمبها، وتاخد واحدة تانية ويبقى معاك اتنين.. ويراقب الطفل يشوفه هايعمل إيه.. فيه أطفال قدرت تستنى.. وأطفال لأ.. لحد هنا تجربة عادية.. اللي كان ثوري بقى.. هو الـfollow up ، إن العلماء.. استمروا ف مراقبة الأطفال دول.. لحد ما كبروا.. ولقوا حاجة غريبة جدًا.. الأطفال اللي قدروا يستنوا قطعة المارشميلو التانية.. كانوا اجتماعيين اكتر.. واشطر ف المدرسة.. وناجحين ف الشغل أكتر.. من اللي مقدروش يستنوا.. من هنا قسموا الناس نوعين: ناس عندها الـ instant gratification إن حد عايز يشبع رغبته دلوقتي.. وناس عندها الـdelayed gratification أو القدرة إنه يستنى فترة عشان ياخد نتيجة أحسن.. وإن الناس اللي عندها صفة الـdelayed gratification دي.. بنسبة كبيرة بقوا أنجح ف حياتهم بعد كده..
في النهاية حاول تعزل نفسك ف مكان عشان تقلل على قد ما تقدر الحاجات اللي بتسبب التشتت.. فيه طريقة مشهورة اسمها pomodoro technique.. إنك تشتغل 25 دقيقة وتاخد 5 دقايق بريك وهكذا.. دي افضل طريقة عشان دماغك متنفصلش عن الشيء اللي بتعمله.. جهز حاجات سريعة تكافئ نفسك بيها لما تنجح إنك تبدأ وتنجز حاجة.. متشغلش الحلقة الجديدة من المسلسل غير لما تخلص كذا أو كذا.. ف ده يبقى دافع تخلص.. حاجة تانية مهمة إن الشخص ياخد أجازه.. في دراسة اتنشرت عام 2016، لقت إنه الناس اللي بتقضي ع الأقل ساعتين ف الأسبوع ف أماكن طبيعية معدلات التوتر والاكتئاب عندهم أقل.. وصحتهم النفسية أحسن.. عشان كده الناس بتحب تسكن قريب من أماكن فيها مناظر طبيعية..
