بس يا سيدي، خرجت من عند صاحبك بتاع كلية العلوم متضايق ومش طايق نفسك، بس عندك إصرار كبير إنك تثبت إن جدك صح، وفي نفس الوقت مش عارف تجاوب أسئلة صاحبك بتاع التاريخ ولا صاحبك بتاع كلية علوم. ف روحت تتمشى في الهوا وسرحت شويه، ووسط مانت سرحان سمعت صوت الست أم كلثوم من بعيد بتغني كلمات إبراهيم ناجي وبتقول “يا فؤادي لا تسل أين الهوى .. كان صَرحاً من خيالٍ فهوى .. اسقني واشرب على أطلاله .. واروِ عني طالما الدمع روى” وسرحت في الكلمات وفي المجاز، ومع حلاوة صوت الست وانت في لحظة روقان قولت طب والله جدي كان برنس ويعرف يكتب كلام لا يقل مجازاً عن كلام إبراهيم ناجي، وبعد كوبليه كمان من الست لقيت نفسك بتفكر إن يمكن اللي جدك كان كاتبه ده مجاز وانت اللي على عاتقك إنك تفُك سِرُّه.

في لحظه طلعت الموبايل ونكشت على رقم صاحبك بتاع كلية آداب وروحت قابلته على القهوه وحكيتله القصه، وقولتله إنك توصلت لحل وهو إن المكتوب ده مجاز وإنه عايزه يساعدك تفُك معناه. أخد منك الورقه وقراها كذا مره وانت مستنيه يتكلم بس مبيتكلمش. ف سألته ساكت ليه ف قالك أصل مش لاقي المُفتاح. بعد عشر ثواني كنت بتفكر فيهم إنك صاحبك ده عبيط أو مجنون قالك إن المفتاح اللي يقصده مفتاح المجاز، العلامه اللي بيديها الكاتب عشان يقول للقارئ إن النص مجازي. زي مثلاً الصوره اللي رسمها إبراهيم ناجي “يا فؤادي لا تسل أين الهوى .. كان صَرحاً من خيالٍ فهوى” أكيد يعني الحُب مكانش مبني ووقع، هنا من الواضِح إن في مجاز لإن الصوره مالهاش وجه تتقري بيه غير كده. أي واحد يسمع البيت ده مش هايشتبه تماماً في إنه مجازي.

الكلام معجبكش، وقولتله ما كلام جدي أكيد مجازي عشان الميه بتغلي عند 100 درجه وهو قال إنها كانت 140 ومش بتغلي. ف حاول يشرحلك إن في إحتمالات كتير أوقع من المجاز، من ضمنها إن الثيرموميتر بتاع جدك كان بايظ، ف انت خدت الإهانه تجاه الثيرموميتر بتاع جدك بشكل شخصي ولبست الواد كوباية القهوه في وشه ومشيت من غير ما تحاسب.

كده وبعد ما لفيت على كل أصحابك وكلهم خذلوك مبقاش في حد تاني تروحله. لأ ثانيه! في حد ممكن تروحله. صاحب جدك اللي عنده دلوقتي بتاع 95 سنه. أكيد يعرف حاجه عن الموضوع وممكن يفسرهولك. بعد شوية مكالمات عرفت توصل لمكانه بالظبط وروحتله البيت، وبعد ما خبطت كتير على الباب وشتمك وقفل الباب في وشك مرتين قدرت توضحله إنك حفيد صاحبه وعايز تسأله سؤالين في السريع وتمشي. حكيتله القصه وطبعاً أبدى إهتمام كبير إنه يفتكر صاحب عمره ويتكلم عنه. وريته الورقه وقراها كويس وقالك إن من معرفته القريبه بجدك يعتقد إن جدك عمره ما يكدب ومدام قال كده يبقا حصل فعلاً. أخيراً لقيت حد رأيه من رأيه، واحد كبير في السن وعنده خبره في الحياه وأكيد مش هايسوحك زي العيال أصحابك. صاحب جدك أكدلك إنك لازم تثق في جدك وأي تهاون في حقيقية القصه يعتبر تهاون في سمعة جدك. على الرغم إن في صوت جواك كان بيقولك إن أي تفسير تاني مش بالضروره معناه إن جدك كداب، ممكن ببساطه يكون بيحكي قصه خياليه أو خواطر أو حتى مجاز زي مانت قولت. أصل مش كل حاجه تتصنف صدق وكذب يعني، كلها عنواين بتختلف بحسب نوع النص والهدف منه والسياق وكل دي حاجات انت متعرفهاش وجدك الله يرحمه من بتاع 30 سنه ومش هاتعرف تروح تسأله … على الأقل دلوقتي!

المشكله إن كلام صاحب جدك محلش أسئلة العيال أصحابك، كل الفكره إنه شجعك تكمل وتصدق جدك، بس مفيش حلول للمشاكل اللي جت قدامك ومبقيتش عارف تطلعها من دماغك. وبدأت تفكر تاني في نظريه تجمع كل المعلومات اللي وصلتلها، ف قررت ترجع البيت وتتكلم مع والدك كمحاوله أخيره، يمكن يعرف حاجه عن الورقه دي اللي ممكن تكون إتكتبت قبل ما يتولد بخمس سنين لأنه مواليد 1960. روحتله ووريته الورقه ف سألك عن المكان اللي لقيتها فيه، ف قولتله المكان بالظبط. خد الورقه وبص فيها وقراها كويس، وبعد كده سألك: “إشمعنى قولت إن جدك اللي كتبها؟” ف قولتله أصل بديهي يعني إنها كانت وسط ورقه، وطبعاً معرفتوش تحددو إن كان هو اللي كتبها ولا لأ عشان كانت مكتوبه على آله كاتبه قديمه. وكده ظهرت مشكله رابعه أو خامسه، مصيبه ليكون جدك مكتبهاش أصلاً! وده إحتمال جديد ووارد لإن أخو جدك كان بردو بيكتب قصص قصيره، وأخوهم التالت كان عندو شيزوفرينيا وضلالات وحالته صعبه ومات صغير. تكونش الورقه دي من تأليف عم من الإتنين؟ أو يمكن حتى من تأليف واحد ما أصحاب جدك اللي كانو بيجوله المكتب! الموضوع إتعقد جداً.